Sivanandalahari-13

అసారే సంసారే నిజభజన దూరే జడధియా

భ్రమన్తం మామన్ధం పరమ కృపయా పాతుముచితమ్ |

మదన్యః కో దీనస్తవ కృపణ రక్షాతి నిపుణ

స్త్వదన్యః కో వా మే త్రిజగతి శరణ్యః పశుపతే || (13)

అసారే సంసారే = నిస్సారమైన సంసారమునందు
నిజ భజన దూరే = ఆత్మవిచారణకు దూరముగా
జడ ధియా = (నా) మందబుద్ధి కారణముగా
భ్రమన్తం = పరిభ్రమించుచున్నాను
మాం అన్ధం = అంధుడనగు నేను
పరమ కృపయా = (నీవు) పరమ కరుణతో
పాతుం ఉచితం = రక్షణనొసగుట తగియున్నది
మద్ అన్యః  = నేను కాక
కః దీనః తవ = అంతకంటే దీనులైనవారు నీకు ఎవరున్నారు?
కృపణః రక్ష అతి నిపుణః = ఓ దీనరక్షణా పరాయణా
త్వద్ అన్యః కః వా = నీవుగాక ఇంకెవ్వరు
మే = నాకు
త్రిజగతి = ఈ త్రిభువనములలో
శరణ్యః = శరణ్యము?
పశుపతే = ఓ పశుపతీ, సర్వ జీవులకు ప్రభువైనవాడా

నిస్సారమైన సంసారమునందు, ఆత్మవిచారణకు దూరముగా, అంధుడనగు నేను, నా మందబుద్ధి కారణముగా పరిభ్రమించుచున్నాను. ఓ దీనరక్షణా పరాయణా, అట్టి నాకు, నీవు పరమ కరుణతో రక్షణనొసగుట తగియున్నది; నాకంటే దీనులైనవారు నీకు ఎవరున్నారు? ఓ పశుపతీ! ఈ త్రిభువనములలో కేవలము నీవే నాకు శరణ్యము

The above image is from: http://senderosdeiluminacion.bligoo.com/