Sivanandalahari-10

నరత్వం దేవత్వం నగ వన మృగత్వం మశకతా

పశుత్వం కీటత్వం భవతు విహగత్వాది జననమ్ |

సదా త్వత్పాదాబ్జ స్మరణ పరమానన్ద లహరీ

విహారాసక్తం చేత్ హృదయమిహ కిం తేన వపుషా || (10)

నరత్వం = మనుష్య జన్మ
దేవత్వం = దేవ జన్మ
నగ వన మృగత్వం = పర్వతములలో (లేదా) అరణ్యములలో మృగముగా
మశకతా = దోమగా
పశుత్వం = పశువుగా
కీటత్వం భవతు = (లేక) కీటకముగా జన్మను పొందినను
విహగత్వ ఆది జననమ్ = (లేదా) పక్షి ఇత్యాదులలో దేనిగా జన్మించినప్పటికీ,
సదా = ఎల్లపుడూ
త్వత్పాదాబ్జ స్మరణ = నీ పాద కమలముల చింతనము అనెడి
పరమానన్ద లహరీ = పరమానందదాయక ప్రవాహమునందే
విహార ఆసక్తం = విహరించవలెననెడి ఆసక్తి కలిగినటువంటి
చేత్ హృదయం ఇహ = హృదయము ఇక్కడ (నాయందు) ఉన్నట్లయితే
కిం తేన వపుషా = ఏ జీవిగా జన్మించితే మాత్రము (వచ్చిన నష్టం) ఏమి?

ఓ పరమశివా! మనుష్య జన్మకానీ, దేవ జన్మకానీ, పర్వతారణ్యములయందు మృగముగాకానీ, పశువు, దోమ, కీటకములు, పక్షులు ఇత్యాది జీవులలో దేనిగా నేను జన్మించినప్పటికీకూడ, నీ పాదాంబుజముల నిరంతర స్మరణమనెడి పరమానంద ప్రవాహములో విహరించుటయందు ఆసక్తి కలిగిన హృదయము నాకు కలిగినట్లయితే, ఎటువంటి శరీరములో జన్మను తీసుకుంటేమాత్రమేమి? (ఓ ఈశ్వరా! నాకు ఫలానా జన్మనే ప్రసాదించమని నిన్ను కోరను; పూర్వ కర్మానుసారము ఏ జీవిగానైననూ జన్మించెదనుగాక, కానీ పైన తెల్పినట్టి గుణములు కలిగిన హృదయమునుమాత్రము నాకు ప్రసాదించవలసినదిగా నిన్ను ప్రార్ధించుచున్నాను.)

కొన్ని వివరణలు:

(1) శివానందలహరి అంతా సమయాభావమువలన పారాయణము చేసుకోవడము కుదరనప్పుడు, నిత్య పారాయణ కోసమని, 10 అతిముఖ్య శ్లోకములను భగవాన్ శ్రీ రమణ మహర్షి తెలిపారు. అలా భగవాన్ రమణులు ఎంపికచేసిన 10 శ్లోకములలో ఈ శ్లోకము ఒకటి.