Sivanandalahari-6

  ఘటో వా మృత్పిణ్డోஉప్యణురపి చ ధూమోஉగ్నిరచలః
పటో వా తన్తుర్వా పరిహరతి కిం ఘోరశమనమ్ |

వృథా కణ్ఠక్షోభం వహసి తరసా తర్కవచసా
పదాంభోజం శంభోర్భజ పరమసౌఖ్యం వ్రజ సుధీః || (6)

ఘటో వా మృత్పిణ్డః అపి = కుండ అయినా, లేదా మట్టి అయినా
అణుః అపి = లేక (కేవలము) అణువులు అయినా
చ = అదే విధముగా
ధూమోగ్నిః అచలః = పొగ కనిపించుచున్నది కావున, బహుశా పర్వతముపై నిప్పు ఉండవలెను (మొ|| హేతువాదములూ)
పటుః వా తన్తుః వా = వస్త్రమా లేక దారములా (ఇత్యాది తర్కములు)
పరిహరతి కిం = పరిహరించగలవా?
ఘోరశమనం = ఘోరమగు మృత్యువును
వృథా = (నీవు) వ్యర్ధముగా
కణ్ఠక్షోభం = కంఠశోష
వహసి = పొందుచున్నావు
తరసా తర్కవచసా = తీవ్రమైన తర్క వాదములతో
పదాంభోజం శంభోః భజ = శంభుని పాదకమలములను భజింపుము
పరమసౌఖ్యం వ్రజ = (తద్వారా) పరమ సౌఖ్యములను పొందుము
ధీః = ఓ బుధ్ధిమంతుడా!

"కనబడుచున్న ఆ వస్తువు కుండయా? లేక మట్టియా? లేక అణువులా?" వంటి తర్క వాదములు; "దూరముగా ఆ కొండపై పొగ కనిపించున్నది కాబట్టి అచట నిప్పు ఉండి తీరవలెను" వంటి హేతువాదములు; "దీనిని వస్త్రముగా చూడవలెనా? లేక దారముల సమూహముగా చూడవలెనా?" వంటి శుష్క వాదములను తీవ్ర స్థాయిలో చేయుటవలన కేవలము వ్యర్ధముగా కంఠశోష తప్ప ఎంతమాత్రము ప్రయోజనము లేదు. అట్టి అనవసర వాదములు మనలను ఘోరమగు మరణమునుండి ఏమైనా రక్షించగలవా? అందువల్ల, ఓ బుధ్ధిమంతుడా! వాటి బదులు పరమశివుని పాదకమలములను పూజించుచూ పరమ సౌఖ్యములను పొందుము.

కొన్ని వివరణలు:

(1) శివానందలహరి అంతా సమయాభావమువలన పారాయణము చేసుకోవడము కుదరనప్పుడు, నిత్య పారాయణ కోసమని, 10 అతిముఖ్య శ్లోకములను భగవాన్ శ్రీ రమణ మహర్షి తెలిపారు. అలా భగవాన్ రమణులు ఎంపికచేసిన 10 శ్లోకములలో ఈ శ్లోకము ఒకటి.