Sivanandalahari-4

సహస్రం వర్తన్తే జగతి విబుధాః క్షుద్రఫలదాః
న మన్యే స్వప్నే వా తదనుసరణం తత్కృతఫలమ్ |
హరి బ్రహ్మాదీనామపి నికటభాజామసులభం
చిరం యాచే శంభో శివ తవ పదాంభోజ భజనమ్ || (4)

సహస్రం వర్తన్తే = అసంఖ్యాకముగా ఉన్నారు
జగతి = ఈ జగత్తునందు
విబుధాః = దేవతలు
క్షుద్రఫలదాః = అల్పమైన ఫలములను ప్రసాదించువారు
న మన్యే = నేను పరిగణించను
స్వప్నే వా = (కనీసము) కలలోకూడా
తదనుసరణం = వారిని అనుసరిద్దామనిగానీ
తత్ కృత ఫలం = (లేదా) వారు ప్రసాదించగల ఫలముల గురించిగానీ
హరి బ్రహ్మాదీనాం అపి = హరి బ్రహ్మాదులవంటివారికి కూడా
నికటభాజాం = నీ సాన్నిధ్యమునందేయున్న
అసులభం = దుష్కర సాధ్యమైన
చిరం యాచే = నిరంతరమూ యాచించుచున్నాను
శంభో = ఓ శంభో, ఆనందమును కలిగించువాడా
శివ = ఓ శివా, పరమ మంగళస్వరూపా
తవ = నీ
పదాంభోజ భజనం = పాదకమలములయొక్క సేవను

ఓ శంభో, ఈ జగత్తునందు అల్పమైన ఫలములను ప్రసాదించు దేవతలు అసంఖ్యాకముగా ఉన్నారు. అట్టివారిని అనుసరిద్దామనిగానీ, లేదా వారు ప్రసాదించగల ఫలముల గురించిగానీ నేను కనీసము నా కలలోనైనా ఆలోచించను. ఓ పరమశివా, నీ సాన్నిధ్యమునందేయున్న హరి బ్రహ్మాదులవంటివారికి కూడా దుష్కర సాధ్యమైన నీ పాదకమలములయొక్క సేవాభాగ్యమును ప్రసాదించమని మాత్రమే నిన్ను నిరంతరమూ యాచించుచున్నాను.